"31 mart soyqırımı erməni faşizminin antibəşəri simasıdır"

"Soyqırım siyasəti erməni vandalizminin ayrılmaz tərkib hissəsidir. Qandan və qətliamdan qidalanan erməni terrorizminə dair faktlar saysız-hesabsızdır. Bunlardan biri də 31 mart 1918-ci ildə azərbaycanlılara qarşı törədilən misli görünməmiş və genişmiqyaslı genosiddir.
105 il öncə təcavüzkar erməni millətçilərinin xalqımıza qarşı milli-etnik zəmində həyata keçirdiyi bu kütləvi qətliam bəşəriyyət əleyhinə qəddar və amansız cinayətlərdəndir".

Bu sözləri Sonxeber.az-a Milli Məclisin deputatı Siyavuş Novruzov deyib.

O bildirib ki, erməni quldur dəstələrinin təkcə Bakıda deyil, Şamaxıda, Qubada, Qarabağda, Zəngəzurda, Naxçıvanda, Lənkəranda və digər bölgələrdə dinc əhaliyə qarşı soyqırım törətməsi, beş ay ərzində 50 mindən çox soydaşımızın genosid qurbanı olması erməni faşizminin antibəşəri simasını göstərir.

"Bir əsrdən artıq müddət keçməsinə rəğmən, qan yaddaşımız olan bu tarixi faciə milli-tarixi hafizəmizdən silinməyib və silinməyəcək. Müstəqillik dövründə Ulu Öndər Heydər Əliyevin təşəbbüsü əsasında siyasi-hüquqi qiymət verilən 31 mart soyqırımı ilə əlaqədar Prezident İlham Əliyevin və Birinci vitse-prezident Mehriban xanım Əliyevanın təşəbbüsləri əsasında sistemli və məqsədyönlü tədbirlər həyata keçirilir, həqiqətlər beynəlxalq ictimai rəyə təqdim olunur, erməni vandalizminin əsl siması aşkara çıxarılır".