Dövlətə məxsus dəniz sahilində özbaşınalıq: “İstəsəm, suyun içində də çətir qoyaram!”

Novxanı və Buzovna çimərliklərində vətəndaşlar dövlətə məxsus dəniz ərazilərində ödənişsiz istirahət hüququndan məhrum edilir.

Redaksiyamıza daxil olan məlumata əsasən, bu ərazilərdə fəaliyyət göstərən bəzi şəxslər, çətir (zontik) və digər sadə çimərlik avadanlıqları üçün insanlardan qanunsuz ödəniş tələb edirlər.

Hadisə yerində olan çəkiliş qrupunun müşahidələrinə əsasən, özünü “məsul şəxs” kimi təqdim edən bir nəfər vətəndaşlara yaxınlaşaraq, çətirdən istifadə üçün pul istəyib. Vətəndaşlar isə həmin ərazinin dövlətə məxsus olduğunu bildirib və ödəniş verməkdən imtina ediblər. Bu zaman həmin şəxs kobud şəkildə belə deyib:
“Bura mənimdir! İstəsəm, suyun içində də çətir qoyaram, müştəri otuzduraram.”

Lakin çəkiliş aparıldığını gördükdən sonra həmin şəxs kameradan yayınaraq ərazidən uzaqlaşıb.

Qeyd edək ki, Azərbaycan Respublikasının Torpaq Məcəlləsinin 4-cü və 5-ci maddələrinə əsasən, dövlət torpaqlarının icarəyə verilməsi yalnız rəsmi hüquqi əsaslarla mümkündür. Bu ərazilərin şəxsi mənfəət naminə istifadəsi qanun pozuntusu hesab olunur və məsuliyyət yaradır.
Vətəndaşlara belə hallarla qarşılaşdıqda hüquqi addımlar atmaları tövsiyə olunur.