Fərhad Bədəlbəyli: “Əgər Fondun bir qəpik pulu lazım olmayan yerə getsə...”

“Bəzi adamlar deyirlər ki, koronavirus boş şeydir, inanmayın. Amma bu, düzgün yanaşma deyil”.

Oxu.Az-ın məlumatına görə, bunu Nazirlər Kabineti yanında operativ qərargahın keçirdiyi mətbuat konfransında Koronavirusla Mübarizəyə dəstək Fondunun İctimai Nəzarət Şurasının üzvü Fərhad Bədəlbəyli bildirib.

O qeyd edib ki, bu böyük bir bəladır:

“Bu xəstəliyə ciddi yanaşmaq lazımdır. Bəziləri telekanallarda əyləncə verilişlərinin verilməsindən danışırlar. Bu gün bizə ciddi kliplər lazımdır. Əyləncə məsələsi sonraya qalsın”.

F.Bədəlbəyli əlavə edib ki, bu gün telekanallarda ciddilik çatmır:

“Fondun əsas işi təbliğat olacaq. Fonda hər kəs ödəniş edib. Bu 1 manat da, 15 manat da, 15 min manat da olub. Əgər Fondun bir qəpik pulu lazım olmayan yerə getsə, bütün azərbaycanlılara təhqir olacaq”.