Sərt karantin rejimi ilə bağlı daha bir açıqlama: Yaya doğru...

Son həftə koronavirusa yoluxmada ötən müddətə nisbətdə artım müşahidə olunur. Keçən il indiki kimi 300 yoluxma olduğu zaman sərt karantin rejimi tətbiq edilmişdi. Bu səbəbdən hazırda yenidən sərt karantin rejimi məsələsi gündəmə gəlir.

Məsələ ilə bağlı danışan professor Adil Qeybulla sərt karantin rejiminin tətbiqinə ehtiyac olmadığını və yaya doğru pandemiyanın bitəcəyini bildirib:

"Yoluxma sayının sürətlə artması epidemoloji vəziyyətin pisləşməsi deməkdir. Son günlərdə yoluxmada müəyyən enmə və qalxmaların olması normaldır. ÜST rəhbəri pandemiyanın nəzarət altına alındığını desə də mutasiya hələ də var. Lakin bu pandemiyanın uzun müddət davam edəcəyi anlamına gəlmir. Bu baxımdan hesab edirəm ki, yaya qədər hətta yoluxma sayında zamanla müəyyən artmalar olsa belə, biz pandemiya ilə vidalaşacağıq.

Lakin indiki məqamda vaksinasiyaya önəm vermək, karantin qaydalarına riayət etmək lazımdır. Bununla bərabər karantin qaydalarının sərtləşdirilməyəcəyi qənaətindəyəm".