Yakutskda yanğın həyatı iflac etdi: Aeroport da bağlandı

Yakutsk hava limanı bölgədəki meşə yanğınlarının tüstüsü səbəbindən uçuşları təxirə salıb.

Bu barədə hava limanının "İnstagram" sosial şəbəkəsindəki səhifəsində məlumat yayılıb.

Məlumata görə, uçuşların həm qəbulu, həm də gedişi dayandırılıb: "Hava şəraiti yaxşılaşana qədər hava limanı uçuşları qəbul edə və göndərə bilməz" deyilir".

Əlavə olaraq, Lena çayında tüstü səbəbilə gəmi hərəkətinin dayandırıldığı da bölgə hökumətinin saytında qeyd edilib.

Yakutsk Hidrometeorologiya və Ətraf Mühitin Monitorinqi Departamentinin məlumatına görə, Yakutiyanın 18 bölgəsində tüstü müşahidə olunur. Yakutiyada yanğınlar iyulun əvvəlində quru və isti hava səbəbindən başlayıb.