Maraqlı iddialar - Ramiz Mehdiyev meydan hərəkatında olub yoxsa olmayıb?

AMEA Coğrafiya İnstitutunun şöbə müdiri Ənvər Əliyevin “Meydan sirləri” kitabında paylaşdığı fikirlər birmənalı qarşılanmayıb. O qeyd edib ki, 1988-ci il mayın 18-də indiki Azadlıq meydanında Ermənistan və Moskva əleyhinə keçirilən mitinqə bir çox rəhbər işçilər qatılıb və hətta mitinqi o vaxtkı ideoloji işlər üzrə katib Ramiz Mehdiyev açıb.

“May ayının 18-də Akademiya işçiləri və bir qrup tələbə ilə mən də ənənəvi yolla saat 10-a yaxın meydana çatdıq. Yolda bizə heç bir maneçilik olmadı. Mitinqi MK katibi Ramiz Mehdiyev açıb onu aparmağı Nüsrət Kəsəmənliyə həvalə etdi. Meydanda şüarlar çox idi. Tribunada olan bütün şair, yazıçılarımız, alimlərimiz, Dağlıq Qarabağ da daxil olmaqla bir çox başqa yerlərdən gələn qonaqlar da danışdı. Tələblərin sayı-hesabı bilinmirdi. Burada səslənən məlumata görə, Azərbaycan KP MK-nın birinci katibi Kamran Bağırov Qarabağa aid məsələnin həlli üçün Moskvaya getmişdi...

Əvvəlki mitinqlər kimi burada da çoxlu şeirlər söylənildi. Axırda Zeynəb Xanlarova “Qarabağın maralı” mahnısını da oxudu. Mitinq əsl çal-çağırla qurtardı. Ancaq çıxışlardan, tələblərdən, işin ümumi gedişindən nəticə çıxarmalı çox şey vardı...”

Ramiz Mehdiyevin meydan hərəkatında görünmədiyini bir çox insanlar , o günlərin canlı şahidləri , keçmiş Cəbhəçilər qeyd edirlər. Kitab müəllifinin dedikləri ilə meydan hərəkatını xatırlayanların dedikləri nədənsə üst-üstə düşmür.

Ən dəqiq cavabı isə o günlərin fəalllarından almağa çalışırıq.

Azərbaycan Xalq Partiyasının ilk sədri, hal-hazırda sıravi üzvü, cəbhə hərəkatının fəal üzvlərindən Pənah Hüseyn Bizimyol.info saytına verdiyi açıqlamada bildrb kİ, azadlıq hərəkatı başlayarkən meydanlarda Ramiz Mehdiyevə rast gəlməyib və onun iştirakını xatırlamır.

“Mən Rəyasət Heyətində tribunada olmamışam. O vaxt Ramiz Mehdiyev artıq ideoloji şöbədə deyildi. Səhv etmirəmsə. Rəhbər vəzifədən çıxarılmışdı. Onu mən şəxsən meydan hərəkatında görməmişəm.Ramiz Mehdiyev ideoloji məsələlər üzrə katib idi, lakin meydan hadisələri zamanı o artıq vəzifədə deyildi və mən onu meydanda görməmişəm”.

Azərbaycan Xalq Cəbhəsi Partiyası sədrinin müavini olmuş, “Böyük Quruluş Partiyası”nın sədri, Milli Məclisin V çağırış deputatı Fazil Mustafa da məsləyə belə münasibət bildirdi:

“O dövrdə Vəzirovun hakimiyyət dövrü idi. Hərəkatın başlanğıcında iştirak etmiş bir insan kimi mən onun iştirakını müşahidə etməmişəm.İlk dəfədir mən bunu duyuram. Fuad Musayevin və bəzi hakimiyyətdə təmsil olunan şəxslərin adlarını eşitmişəm, lakin onun adına rast gəlməmişəm. Bu günə qədər Ramiz Mehdiyevin adının hallandığının şahidi olmamışam. O spontan hərəkat idi. Orda kiminsə istiqamətverici rolu olduğunu düşünmürəm. Ola bilər ki, bu gün kimlərsə bu məəsləni oryata və gündəmə gətirməklə hansısa məqsədələr üçün istifadə etmək istəyir.Bu başqa mövzudur. O zaman hərəkatın başlanmasını hakimiyyət içində dəstəkləyənlər var idi. Onlar Vəzirova qarşı mövqe tutmuşdular. Bir qismi Qarabağ məsələsinə dəstək vermək üçün xalqın yanında dayanmağa üstünlük verirdi. Lakin Ramiz Mehdiyevin bu hərəkatın başında durması barədə deyilənlər mənə inandırıcı gəlmir”.